Amasomo matagatifu
tuzirikana:
Isomo rya mbere: Ivug 8, 2-3.14b-16a
Zaburi 147, 12-13, 14-15,
19-20
Isomo rya 2: 1Kor 10, 16-17
Ivanjiri: Yh 6, 51-58
Bakiristu
bavandimwe, kuri iki cyumweru turahimbaza umunsi mukuru w’Isakramentu
Ritagatifu ry’Umubiri n’Amaraso bya Yezu Kristu. Turahimbaza Yezu ubana natwe,
Yezu watwihaye mu Isakramentu ry’Ukaristiya akaba icyarimwe ifunguro n’incuti tubana.
Kuri uyu munsi umuntu yakongera kwibaza: kuki Imana yatwihaye mu Ukaristiya?
Ukaristiya ni iki? Kuki dutambagiza Isakramentu Ritagatifu? Ese Yezu mpurira he na we? Ese muhabwa nte?
Ese ni uwuhe mwanya muha mu buzima bwanjye bwa buri munsi? Ese ni uwuhe mwanya
mpa Misa, igitambo cy’ukaristiya?
Ijambo
ry’Imana tumaze kumva ryatweretse Imana Rukundo ruduhora hafi, rukadutabara
bwangu aho rukomeye. Ngiyi Misa duhimbaza ishushanya ibirori Imana idukorera
hano ku isi bitwerekeza ku birori by’ijuru. Gatigisimu ya Kiliziya Gatolika
itwibutsa ko Ukaristiya ari isakramentu ririmo Yezu Kristu ubwe rwose n’umubiri
we n’amaraso ye mu bimenyetso by’umugati na Divayi akatubera icyarimwe igitambo, ifunguro n’inshuti tubana.
Aya magambo 3: igitambo, ifunguro n’inshuti arakomeye nk’aturangira umugati
w’ubugingo buhoraho. Yezu yitanzeho igitambo ngo aducungure ubwo yaremye
Ukaristiya kuwa kane mutagatifu araye ari budupfire ubwo yavugaga ati iki
ni umubiri wanjye iki ni amaraso yanjye. Ukaristiya ni izina rituruka ku ijambo
ry’ikigereki « eucharistein » risobanura gusingiza, gushimira Imana.
Ni Ijambo rigaragaza umuntu ushimira Imana:
kuko Imana yamuhagije ibyiza byayo; kuko Imana yamugaburiye;
kuko Imana yamumaze inzara n’inyota; kuko Imana yamuruhuye.
Amasomo
ya none atweretse ko umuryango w’Imana wagombye guhura n’akaga gakomeye kugira
ngo uzashobore kubona no guha agaciro ubuvunyi bw’Imana. Mu isomo rya mbere, tubonye Musa yibutsa Abayisraheli
ibyago byose bahuye nabyo mu mateka yabo ya kera na kare: Urugendo rurerure mu
butayu, Inzara n’inyota byabiciye mu butayu.
Ubu
buzima bubi Abayisiraheyi bagiriye mu butayu buratwigisha ko umugambi w’Imana
atari uwo kubabaza umuryango wayo, si uwo kuwugerageza, ahubwo umugambi w’Imana
ni uwo kwigisha umuryango wayo: Imana iratwigisha ko ari Yo itugoboka iyo izindi
mbaraga zose zadushiranye. Imana iratwigisha ko ari Yo iturwanirira iyo intege
zacu zacitse.
Imana iratwigisha ko ari Yo iturengera iyo twabuze kirengera. Imana
yagaragarije umuryango ko ari KIMARANZARA: Imana yabigaragaje ibaha amazi avuye
mu rutare rukomeye;
Imana yabigaragaje ibagaburira umugati uvuye mu ijuru.
Hari
ubwoko 4 bw’ifunguro ryari risanzwe rikoreshwa mu bayisraheli bwagenuraga
Ukaristiya: Manu, ifi, umugati na
Divayi. Manu Imana
yagaburiye Abayisraheli nk’uko twabizirikanye mu isomo rya mbere ari byo Musa
ari kwibutsa Abayisraheli ati Uhoraho
yagucishije bugufi, atuma wicwa n’inzara maze akugaburira Manu utari usanzwe
uzi n’abasokuruza bawe batigeze bamenya, ari ukugira ngo akumenyeshe ko umuntu
adatungwa n’umugati gusa ko ahubwo atungwa n’ijambo ryose riturutse mu kanwa
k’Uhoraho.
Mbere
y’uko ashyira mu bikorwa iki gikorwa gitagatifu cyo kwitangaho ifunguro ry’ubugingo
bw’iteka, yabanje gutegura abigishwa be mu nyigisho twumvise mu Ivanjili ya
none, agira ati:
“Ni jye mugati muzima wamanutse mu ijuru. Urya uwo mugati azabaho iteka”. “Urya
umubiri wanjye, akanywa amaraso yanjye agira ubugingo bw’iteka, kandi nzamuzura
ku munsi w’imperuka”. “Nguyu umugati wamanutse mu ijuru: si nk’uwo ba
sogokuruza banyu bariye bakarenga bagapfa; urya uyu mugati azabaho iteka
ryose ».
Bakristu
bavandimwe, ni ubuntu bukomeye Imana yatugiriye mu kwemera kutwihaho
ifunguro.
Ubwo buntu bw’Imana twabwitura iki? Nta kindi usibye GUSHIMIRA IMANA. Umugati nk’ifunguro ryo ku isi ryari risanzwe rikoreshwa mu
bayisraheli, Yezu nawe akawukoresha agaburira abamukurikiye kugirango
abaganishe ku Mugati utanga ubugingo ariwe ubwe.
Divayi yavaga
ku mbuto y’imizabibu, umuzabibu ushushanya umuryango w’Imana na Divayi
ikimenyetso cy’ibyishimo aho Yezu yemera kumena amaraso ye kugira ngo dukire,
tugire ibyishimo, ubumwe nk’uko na Pawulo yabitwibukije mu isomo rya Kabiri
ati mbese inkongoro y’umugisha
tunyweraho dushimira Imana si ugusangira amaraso ya Kristu? N’umugati
tumanyurira hamwe si ugusangira umubiri wa Kristu? Mutagatifu
Tomasi w’Akwino mu nyigisho ze kuri Ukaristiya ntagatifu atubwira uburyo
umugati na Divayi bihinduka umubiri n’amaraso bya Kristu. Mu ndirimbo ye, Rata Siyoni,
atubwira ko Yezu ahabwa ababi n’abeza ariko biranyuranye, abeza bahabwa ubuzima,
ababi bagahabwa uruphu.
Yezu mu Misa araduhaza,
umugati w’ubugingo, ni ukimenyetso
cy’Urukundo yadukunze. Yezu witanga kubera urukundo
akihindura ifunguro agira ngo natwe abasangira twunge ubumwe. Ukaristiya ni ifunguro rya Roho,
ridutera imbaraga za roho tukagira ibyishimo n’amahoro, ni umuti n’urukingo
rw’ikibi.
Bavandimwe,Yezu duhabwa
agenda atuvugurura buhorobuhoro, Ukaristiya ntabwo ari igihembo cy’abakora neza
gusa, cyangwa intungane, ahubwo ni impamba y’abajya mu ijuru, umugati
w’abamalayika, umugati w’abana b’Imana bityo buri mukristu aharanira kuyihabwa
neza yisukuye, yahawe Penetesiya, yitunganyije kugira ngo bitamera nka ya mazi
basuka ku ibuye.
Kuki dutambagiza
Isakramentu Ritagatifu?
Kuri uyu munsi mukuru
cyane, dutambagiza Isakramentu Ritagatifu mu isengesho, mu ndirimbo, mu
byishimo byinshi, abana batera indabo tugaragariza Yezu uri mu Isakramentu
ry’Ukaristiya icyubahiro n’urukundo tumufitiye, tunamwereka iwacu, aho dutuye
kugira ngo ahatagatifuze kandi atagatifuze ibyacu byose, tumushyira abamutaye
ngo abereke ko abakunda.
Ni ngombwa kugira umwanya w’umwihariko wawe ku giti cyawe ugenera Yezu. Utagaruka ngo muganire mwembi mwenyine, biragoye ko wasobanukirwa n’Ukaristiya, biragoye ko watera imbere mu bukristu niba nta mubano wihariye ugirana na Yezu ari byo mutagatifu Yohani Mariya Vianney yavugaga ati Yezu ari muri Ukaristiya ndamureba nawe akandeba kuko mba nizeye ko ahari. Nawe muntu utemera ko Yezu ari muri Ukaristiya, hagomba imyitozo impande zose. ujya mu Misa, usenga, ushengerera. Mukristu rero ntucike intege n’ubwo waba utarasobanukirwa komeza ukora iyo myitozo myinshi yo gusenga uyihate,Yezu arakureba, Yezu arahari, Yezu arakuruzi, Yezu igitambo, Yezu funguro, Yezu nshuti yacu aradukunda yifuza kugumana natwe. Tumusenge, tumurangamire, kumukunde kandi tumukundishe abataramumenya.
Padiri Théogène SENYONI
