Amasomo matagatifu tuzirikana:
Isomo rya 1: Ibar 21,4b-9.10,
Zab78(77)
Isomo rya 2 : Fil 2,6-11
Ivanjili : Yoh 3,13-17
Bavandimwe, kuri iki cyumweru cya 24, gihuriranye na tariki
ya 14 Nzeri, Kiliziya ihimbaza umunsi mukuru w’Umusaraba Mutagatifu wuje
ikuzo. Amasomo matagatifu y’iki cyumweru aradufasha kumva igisobanuro
cy’umusaraba mu buzima bw’Uwemera, mu buzima bw’umukristu, Umusaraba usobanura
iki? Umusaraba wanjye ni uwuhe? Nakira gute umusaraba wa Kristu? Kuki
tugomba kurangamira Umusaraba wuje ikuzo wa Kristu? umusaraba wuje ikuzo wa kristu ni ikimenyetso
cy’umugisha, umusaraba wuje ikuzo wa kristu ni indangamuntu y’uwemera kristu.
1.I. GISOBANURO
CY’UMUSARABA WA KRISTU
Bavandimwe,
mbere y’uko Yezu abambwa ku musaraba, Umusaraba byari ibiti bibiri Abanyaroma
bakoresha kugirango babambeho Abajura, ibisambo, ingegera n’abandi bagome.
Umusaraba wari ikimenyetso cy’umuvumo, icyo gikoresho cy’ubugome bw’abantu
cyagenerwaga abacakara baciriwe urwo gupfa (ku ngoma y’Abaromani). Naho ku
bayahudi, kumanikwa ku giti byari umuvumo w’Imana (Ivug 21,22-23). Yezu rero
yahisemo kwihindura uwo muvumo maze kuva ubwo Umusaraba uhindura isura (Gal
3,13-14; Fil 2,5-11). Bityo umuntu wese uri muri Kristu, yabaye ikiremwa
gishya. Ibishaje byarayoyotse, none ngaha byose byahindutse bishya » (2 Kor
5,16-17). Ng’uko uko Umusaraba wa Kristu wavuguruye isi. Igiti cy’umusaraba
cyitwibutsa ububabare bwa Nyagasani Yezu ndetse kikatubera ikimenyetso
cy’umukiro Kristu yaturonkeye. Umusaraba
ni ikimenyetso cy’urukundo ndengakamere rw’Imana itanga ubuzima. Umusaraba ni
ikimenyetso cyo gutsindwa kw’icyaha, kw’ikibi n’urupfu kuko iyo mpano
itarangirira ku musaraba ahubwo igeza ku izuka. Umusaraba
mutagatifu ni ikimenyetso cy’amizero y’abakristu. Niba rero igiti
cyo muri Paradizo cyarabereye Adamu imbuto y’urupfu, igiti cy’umusaraba cyo
cyabereye abakristu imbuto y’ubugingo, binyuze kuri Kristu, We mukiro wacu
n’amizero y’izuka ryacu. Umusaraba ni ikimenyetso
cy’insinzi ya Yezu Kristu ku rupfu.
2. KUKI
TUGOMBA KURANGAMIRA UMUSARABA WA KRISTU?
Nk’uko
twabyumvise mu isomo rya mbere, kurangangamira Umusaraba wa Kristu biduha
ubuzima. Musa yamanitse inzoka y’umuringa mu butayu
agira ngo akize Abayisraheli ibikomere byakera by’inzoka zabarumiye mu butayu
ni ko n’umuntu wese uzarangamira Kristu wabambwe ku musaraba kandi akawemera,
na we azakira. Umusaraba wa Kristu ni inzira y’umukiro kubemera Yezu Kristu. Turagusenga Yezu
turagushima, y’uko wakirishije abantu Umusaraba wawe mutagatifu! Mu musaraba wa
Kristu twakize umuvumo ukomoka ku cyaha. Uwo musaraba rero wadukijije icyaha
n’urupfu gikurura ukaduha ububasha bwo kubyigobotora ni Urupfu rwa Kristu
n’Izuka rye ryarukurikiye. Hari abantu bajya bibeshya bakabona mu kimenyetso
cy’Umusaraba urupfu gusa. Ndetse banawukubita amaso umutima ugaterera mu mutwe.
Umusaraba rero ukubiyemo insinzi ya Kristu ku rupfu. Ikimenyetso cy’Umusaraba
si icyerekana uko Kristu yapfuye gusa ahubwo ni icyerekana
uko Kristu Yezu yanatsinze urupfu.
N’ubwo kuva kera na kare
Abakristu bazirikanaga ububabare, urupfu n’izuka bya Kristu, bakibuka cyane ukuntu
Yezu yasambiye mu murima wa Getsimani, uko yakubiswe, uko yatamirijwe ikizingo
cy’amahwa, uko bamushoreye bamuhekesheje umusaraba, bamutuka, bamukwena,
bamucira mu maso, bakazirikana uburyo yabambwe ku musaraba akanawupfiraho, uyu
munsi mukuru wakomotse ku ihabwa ry’umugisha rya Kiliziya yitiriwe Izuka rya
Kristu. Iyi Kiliziya yubatse ku mva ya Kristu i Yeruzalemu.
3. UMUSARABA WUJE IKUZO WA KRISTU NI IKIMENYETSO
CY’UMUGISHA
Nk’uko twabyumvise,
amateka avuga ko kubambwa ku musaraba ari bwo buryo bwakoreshwaga n’Abanyaroma
mu kunyonga (kwica) abantu babaga bakoze ibyaha bikomeye cyane maze bagakatirwa
urwo gupfa. Uwo musaraba wabaga ubaje mu giti. Ni na byo ibyanditswe bivuga
biti:” bamwishe bamumanitse” (Intu 5,30; 10,39). Bityo rero igiti cy’urupfu
cyahinduwe n’izuka rya Kristu, kiba gityo igiti cy’ubugingo. Icyo giti nta
kindi ni umusaraba Kristu yabambweho. koko rero umusaraba wahoze ari igihano
cy’abagome ba ruharwa, ariko kuva aho Kristu yemereye kuwubambwaho, wahindutse
igiti cy’agakiza ka muntu n’inzira yo kumvira byahebuje bihesha Imana ikuzo,
ikimenyetso cy’umugisha. twabyumvise mu isomo rya Kabiri (Fil 2,6-11).
4. UMUSARABA WUJE IKUZO WA KRISTU NI INDANGAMUNTU
Y’UWEMERA KRISTU
Bakristu bavandimwe,
Umusaraba tubona mu Kiliziya, mu mashapeli, mu nzu z’abantu, ku mva z’abakristu
bapfuye, umusaraba twambara cyangwa ikimenyetso cy’umusaraba dukora ntabwo ari
umurimbo cyangwa igikinisho ahubwo ni ikimenyetso cy’uko twiyeguriye Imana mu
Butatu butagatifu. Ibyo bikatwibutsa ijambo rya Kristu yavuze agira ati: “nta
wagira urukundo ruruta urw’umuntu uhara amagara ye kubera incuti ze cyangwa ngo
niba hari ushaka kunkurikira ajye yiyibagirwa ubwe, aheke umusara we, maze
ankurikire” (Mt 16,24). Ishema ryacu twahigira abandi ni umusaraba w’umwami
wacu Yezu Kristu kuko muri Kristu n’umusaraba we hari umukiro, hari ubugingo
n’izuka ryacu. Bityo rero gukuza umusaraba ni ikimenyetso cy’urukundo rwihariye
tugaragariza Kristu haba mu mitima yacu no mubigaragarira amaso. Igihe rero
imitwaro y’imisaraba ituremereye ni bwo n’umusaraba wa Kristu uziramo maze
ukayoroshya. Kristu rero yadutuye imitwaro yaturemereraga none tugenda twemye.
Umusaraba, ni wo nzira rukumbi igana amahoro, ibyishimo, inzira igana kuri
Kristu, We soko y’umunezero w’iteka. Turasabwa rero kurata umusaraba,
tuwushyira ahirengeye, tukawubaha, tukawuramya kugeza ku ndunduro, bityo
ukadufasha guhobera ijuru Kristu yadusezeranyije. Nuko rero umusaraba ntutera
isoni umukristu ahubwo ni amizero ye n’ishema rye ni yo mpamvu Pawulo
Mutagatifu agira ati:” njyewe nta kindi nakwiratana kitari umusaraba wa
Nyagasani wacu Yezu Kristu (Gal 6,14). Byongeye, iyo umukristu arangamiye
umusara, awambaye cyangwa akawubaha ku bundi buryo, biba bigirirwa
uwawubambweho, bikamwibutsa ibyo Pawulo Mutagatifu avuga kuri Kristu ati:” ni
umwana w’Imana wankunze, ubwe akigabiza urupfu ari njye agirira” (Gal 2,20).
5.UMUSARABA WA KRISTU
UDUHA KUGIRA URUHARE KUBUGINGO BW’ITEKA
Nk’uko twabyumvise mu
Ivanjili, Umusaraba wa Kristu uduha kugira uruhare kubugingo bw’iteka: ‘‘Mbese
nk’uko Musa yamanitse inzoka mu butayu, ni ko n’Umwana w’umuntu azagomba
kumanikwa, kugira ngo umwemera wese agire Ubugingo bw’iteka. Koko Imana yakunze
isi cyane, bigeza aho itanga
Umwana wayo w’ikinege igira ngo umwemera wese atazacibwa, ahubwo agire ubugingo
bw’iteka” (Yh3,14-16).
Mu gusoza, ndongera guhamagarira abakristu bose kubaho barangamiye
Umusaraba wa kristu, twishimire ikuzo
ry’Umusaraba wa Yezu Kristu, dukuze umusaraba wa Kristu kandi twamamaze
umusaraba wa Kristu, duhimbaze umusaraba wa Yezu Kristu, Yezu wazutse adufashe
no guheka imisaraba yacu kandi twirinde ko yaduca intege.Umubyeyi BikiraMariya
wababaye, akababarana na Yezu adusabire tubone Roho Mutagatifu utwinjiza muri
iryo banga ry’Umusaraba wuje ikuzo wa Kristu. Mbifurije mwese icyumweru kiza.
Padiri
SENYONI Théogène
Retour aux homelies
