Amasomo matagatifu tuzirikana
:
ü Isomo rya
mbere : Iz35,1-6.10 ;
ü Zab146(145) ;
ü Isomo rya
kabiri : Yak 5,7 ;
ü Ivanjiri :
Mt11,2-11
Nimukomere
kandi mwoye gutinya kuko Imana yanyu iraje ubwayo kubakiza
Muri iki
gihe cy’adventi turitegura byahafi guhimbaza iyobera ry’ukwigira umuntu kwa
Jambo, Umukiza w’isi yose, ishusho nyakuri y’Imana rwagati mu muryango wayo.
Imana Nyirimpuhwe kandi ihora yiteguye gutabara no kurengera umuryango wayo. Mu
isomo rya mbere umuhanuzi Izayi mu magambo meza arahumuriza umuryango w’Imana
wihebye agira ati: Nimukomere
mwoye gutinya,Dore Imana yanyu. Iraje ubwayo kubakiza kandi abakijijwe n’Uhoraho
bazatahuka,bagere I Siyoni batere urwamo rw’ibishimo. Ku ruhanga rwabo hazabengerana
ibyishimo bitazashira,ibinezaneza n’umunezero bibasanganire agahinda n’amaganya
bizahunge (Iz35,4.10). Ushobora kwibaza impamvu umuryango wa Israheli watekana
mu gihe wugarijwe n’ubucara no kwiheba ariko ijambo ry’umuhanuzi Izayi rikwiye
kwizerwa kandi rikakiranwa ubwuzu kandi Imana ntiyivuguruza. Imana ubwayo ije
kubakiza kuko ari indahemuka,nyirimbabazi na nyirineza. None se Imana yabakuye
mu gihugu cya Misiri, yananirwa kubakura I Babiloni?none se Imana yaremye Muntu
mu ishusho ryayo yareka muntu abaho ababaye gusa? Aya mateka yose agomba
kubatera guhora batangarira Ububasha bw’Imana, urukundo rwayo ibi kandi bigomba
kubabera impamvu yo kudatakaza ukwemera n’ukwizera byabo. Imana ni mudahemuka ku
isezerano izabagoboka kandi izabarinda nk’uko yabisezeranyije umwami Dawudi (Iz
23). Izabaha Umwami usumba bose,
Umucunguzi wa Isiraheli. Izina rye ni Emmanueli bivuga “Imana turi kumwe”.
Umuryango
wa Israheli ntugomba kugira ubwoba ngo utakaze amizero nubwo bari Iwabandi mu
buhungiro,mu bucakara,mu kaga, bariho bihebye kandi bahebeye urwaje, baribaza
ejo hazaza habo,Nyamara umuhanuzi izayi
arabahumuriza kuko bashonje bahishiwe. Ntakigomba kubatera ubwoba kuko
Nyagasani aje Kubakiza. Bazishima kubera Imana.Irabakunda kandi ni umugenga
w’ubuzima bwabo.
Muri Yo ubuzima
bwabo buzongera kugira igisobanuro. impumyi zizabona,ibipfamatwi bizumve,abacumbagira
bazasimbuke nk’impara,n’iminwa y’ibiragi izatere urwamo rw’ibyishimo.ubutayu buzavubukamo
amasoko, n’imigezi itembe ahantu h’amayaga. Ubutaka butwika buzahinduke
ikiyaga, akarere kishwe n’inyota kavubukemo amasoko y’amazi(Iz35,5-7). Umuririmbyi
wa zaburi ya 146(145) na we ati Uhoraho ni we muvunyi w’abatagira kivurira ati
ningombwa kumwisunga we Mana umuremyi w’Ijuru n’isi,kuko yita kubanyabyago
b’iyi si:aho arenganura abapfa akarengana,abashonji akabaha umugati,abohora
imfungwa,ahumura amaso impumyi,agorora ingingo z’abahinamiranye,agakunda
ab’intungane,arengera abavamahanga,ashyigikira imfubyi n’abapfakazi…Uhoraho ni
Nyiringoma ubuziraherezo (Zab146,7-10)
Mu yandi magambo Uhoraho aramira abagwa
bose,abunamiranye akabaha kwemarara,bose ni we bahanga
amaso bamwiringiye maze akabaha icyo barya igihe kigeze. Abumbura ikiganza cye,maze
ibinyabuzima byose akabihaza icyo byifuza…Uhoraho aba hafi y ‘abamwiyambaza,hafi
y’abamwiyamza babikuye ku mutima.ibyo abamwubaha bashaka arabikora;baba
bamutabaje akabumva,akabagoboka,uhoraho arinda abamukunda bose(zab145).
Ese twebwe abakristu,muri iki gihe cy’adventi, hari
impamvu n’imwe yatuma twishima mu gihe bamwe bugarijwe n’amakimbirane mu ngo?Intambara
zidashira?Inzara iri guca ibintu?ingorane z’urudaca?ubushomeri buri hanze aha?ba
Nyamwigendaho ni benshi?n’ibindi byinshi byugarije isi yacu…. Ni byo koko isi
yugarijwe n’ibibazo binyuranye ariko sibyo herezo. Umunyarwanda ati nta mvura
idahita nta n’ijoro ridacya.
Isomo rya Kabiri yakobo akadushishikariza kwihangana
kuko Nyagasani ari hafi. Ni umugwaneza n’umunyambabazi. Ati nimwitegereze
umuhinzi ukuntu yihangana ategereje ko ubutaka bwe bubyara umusaruro
mwiza,akihangana ubutarambirwa. Bavandimwe ntitugomba gutegereza umukiza mu
kababaro kandi twihebye ahubwo tugomba kwishakamo ubwiyumanganye,kuko mu
bwiyumanganye bwacu niho tuzarokora ubuzima bwacu. Hari igihe ibibazo bituma
dushidikanya ku buntu bw’Imana,ububasha bwayo n’urukundo rwayo maze akababaro
kakaza ku isonga.
Sibyo kuko Imana ishaka ko tugira ibyishimo bisendeye
kandi ntawundi ubitanga mu buryo bwuze uretse Imana yonyine,Nyirububasha,Mudahemuka,
n’umushumba mwiza urinda abe Ikibi kandi akabayobora mu rwuri rutoshya
Mu
ivanjili, Yohani batista ari mu buroko. Arazira Gukebura umwami Herodi wacyuye
umugore wa murumuna we. Bimuviriyemo gusukwa mu buroko. Ntibyoroshye gukebura
ibikomangoma by’iyi si ariko nibwo butumwa n’inshingano by’intumwa y’Imana.
Bisaba rero kuba icyihare. Intumwa igomba guhora irengera amategeko y’Imana,gukebura
abo itumwaho no kubizira rugeretse. Yohani rero muburoko navuga ko yibereye mu
mwijima nta televiziyo,nta radio ariko akurikirana amakuru y’ibibera hanze. Ngo
yari yumvise ibikorwa bya Yezu. Pawulo uburoko buramuriye nuko yohoreza babiri
mu bigishwa be kuri Yezu ngo bamubaze bati: ese uri wawundi ugomba kuza cyangwa
dutegereze undi? Yezu ati nimugende mubwire Yohani ibyo mwumva n’ibyo mubona:
dore impumyi zirabona,abacumbagira baragenda,ababembe barakira,ibipfamatwi
birumva,abapfuye barazuka,n’abakene barigishwa inkuru nziza. Muyandi magambo ni
nko kubabwira ati ndi umukiza n’umucunguzi ibirenze kuri ibyo, Ibikorwa byanjye
birivugira none nimugende muvuge ibyo mwumva n’ibyo mubona. Yohani umwanditsi
w’Ivanjil na we ati niba koko ndakora ibikorwa bya Data,nimureke kunyemera.
Ariko niba mbikora maze mukanga kunyemera nimwemere byibura ibikorwa nkora
kugirango mumenye kandi mwemere ko Data andimo nanjye nkaba muri Data (Jn10,37-38).
Bakristu bavandimwe, natwe Yezu aratubaza ati
muvuga ko ndi nde ? mwumva ko ndi nde? ese Yezu nagaruka azasanga hakiri
ukwemera ku isi, mu byo mpura na byo mubuzima bwa buri munsi?igihe byose
byabaye umwijima? igihe nabuze amahitamo y’ubuzima ? Igihe nabuze
icyerecyezo? uvugako ndinde?igisubizo ni kimwe:Yezu ni Imana turi kumwe mu
gahinda no mubyishimo byacu,mu bwoba bwacu,no mu kwiheba kwacu. Yezu ati
Nimungane mwese abarushye n’abaremerewe,jye nzabaruhura. Tutarikumwe Ntacyo
twashobora,tutarikumwe twabaho nabi tukagwa.
Yezu ashakako tumwumvira igihe cyose kandi mu kumwumvira adushoboza byose. Ashaka
ko tumushimira ibyiza atugirara buri munsi. Ashaka ko tumwemera n’umutima wacu
wose n’amagara yacu yose,ubwenge bwacu bwose n’imbaraga zacu zose. Mu kumwera
aturinda ibigeragezo n’ibishuko maze akaduha imbaraga zo kubisohokamo amahoro
kandi gitwari.Ni We Mukiza w’isi yose,ni Nyirububasha.
Nyagasani uduhe kugera ku biroi bya Noheli no kubihimbazanya
ibyishimo bitageruka n’umutima ubukwiye.
Padiri Alexandre BAYISENGE
