Amasomo matagatifu tuzirikana:
Isomo rya mbere: Ex 17, 3-7
Zab 95 (94), 1-2, 6-9
Isomo rya kabiri: Rm 5, 1-2.58
Ivanjiri: Yh 4, 5-42
Ntihakagire uwicwa n’inyota
kandi dufite Yezu, Isoko y’Ubugingo bw’iteka.
Bavandimwe,
urugendo rwacu rw’Igisibo rurakomeje. Iyi minsi 40 y’Igisibo turimo ni
umwiherero udasanzwe. Ni iminsi yo kuvugurura ukwemera kwacu, kugendana
n’Imana, kwivugurura, kwisubiraho no kugarukira Imana.
Icyumweru
cya 1 cy’Igisibo cyari icyumweru cy’ubutayu. Twajyanye na Yezu mu butayu ngo
tumwigireho gutsinda Sekibi n’ibishuko bye byose. Ku cyumweru gishize twajyanye
nawe mu mpinga y’umusozi yihindura ukundi ngo twitoze kumurangamira no
kumwumvira bityo natwe duhinduke ukundi, duse na We.
Kuri iki cyumweru cya 3 turumva Yezu ufite inyota, inyota yo gukiza
muntu iyo ava akagera. Ni we umara inyota abamugana kuko atanga amazi
y’ubugingo bw’iteka!
Amazi
ni ubuzima. Iyo yabuze ubuzima burahagarara, umwuma, inzara, amapfa,
kwandavura, kwivovota bikaba byinshi… Yezu afite inyota, asonzeye roho zacu ngo
azihaze ibyiza! Ashaka kugendana natwe ngo atumare inyota; araduhamagarira kumurangamira We utanga amazi y’ubugingo bw’iteka. Umwemera
ntazagira inyota bibaho.
Isomo
rya 1 ryatujyanye mu bayisraheli bari mu butayu. Ubutayu ni urugendo rw’umuntu
ushakisha Imana; ni ahantu habuze byinshi mu byo umuntu akenera umunsi ku munsi
ngo abeho neza: haba izuba ryinshi amazi make cg se ntayo, ibinyabuzima bike
cyane ,… ni igihe cy’ibigeragezo aho umuntu asabwa kwirwanaho rimwe na rimwe mu
buryo burenze ubushobozi bwe bityo akahabonera ko agizwe n’Imana yonyine.
Abayisraheli mu butayu
babuze amazi, uko byumvikana,
barivovota, bivovotera Imana na
Musa.
Mu
kigeragezo Abayisraheli bahuye nacyo cyo kubura amazi bibagiwe ibyiza
n’ibitangaza Imana yabakoreye ibakura mu bucakara bwa Misiri bigera aho
bishimira gukomeza kuba abacakara mu Misiri aho gukora urugendo bari kumwe
n’Uhoraho. Bavandimwe, urugendo rugana ubwigenge, urugendo rugana ibyiza
ruravuna, rusaba kwihangana, kwemera guhindura imyumvire, rimwe na rimwe
tukemera no gusenya ibyo twari twubakiyeho.
Amateka
y’Abayisraheli ni amateka yacu nk’abantu: iyo bigenda neza biratworohera gukuza
umubano, iyo bigenda neza umubano n’ubucuti biroroha; ariko ibigeragezo byaza
abari incuti bakaryana. Ni henshi twumva abari incuti baryana, bagasebanya
kubera ibigeragezo; ni henshi twumva umugore umugabo, abaturanyi bari babanye
neza, bagasabana mu byishimo, ariko kubera ikigeragezo cy’uburwayi, ubukene,
kubura urubyaro,… bagahinduka abanzi aho umwe aciye undi akahacisha umuriro….. Muntu
yibagirwa vuba!
No
mu mubano wacu n’Imana hari ubwo bitworohera gusingiza no gukuza Imana mu bihe
byiza ariko twahura n’ibigeragezo
abenshi bakagwa, bakibagirwa ibihe byiza bagiranye n’Imana, bakibagirwa aho
Imana yabakuye; hari abaparika isengesho kuko bibwira ko Imana itakibumva,
abareka amasakramentu, abajya gusenga bakurikiye abandi gusa ariko bitabafasheho,….
Kenshi
twivovotera Imana nyamara yo ntihwema kutugaragariza impuhwe zayo. Yaciriye
inzira abayisraheli, ibaha amazi mu butayu nyamara bo bayidohotseho, bivumbuye
bagashidikanya ububasha bwayo. Ni Imana ikiza muntu yifashishije umuntu:
Ø Yifashishije Musa n’abahanuzi ngo ikize umuryango wayo mu isezerano
rya kera
Ø Yezu
Kristu yigize umuntu apfira ku musaraba ngo adukize kandi twari abanyabyaha.
Nibyo Paulo intumwa atangarira mu isomo rya 2: “…urukundo rw’Imana rwabuganijwe mu mitima
yacu na Roho Mutagatifu
twahawe. Koko rero igihe twari tugifite intege nke, Kristu yapfiriye
abanyabyaha ku munsi wagenwe… Imana rero yerekanye urukundo idufitiye kuko
Kristu yadupfiriye kandi twari abanyabyaha”.
Ø Mu
buzima bwacu bwa buri munsi Imana ntihwema kwifashisha abantu b’umutima mwiza
tukamererwa neza. Tujye tumenya gushimira Imana kuri abo bose yifashisha ngo
tugire ubuzima, tugubwe neza: umuturanyi, umugenzi, umufasha wawe ugukomeza,
uguhumuriza wacitse intege, ugutabara wasumbirijwe, ugutera ibyishimo,…. Tujye
tumenya gushimira Imana ariko tunayemerere itwifashishe kugira ngo abandi
babeho, baryoherwe n’ubuzima; tujye tuyikundira itwifashishe maze umukiro wayo ugere ku bawukeneye bose! Kutagira isoni zo kuba abahamya b’ibyiza
Imana yadukoreye! Ubuhamya nk’ubwo nibwo buhindura abantu nk’uko bwashituye
Abanyasamariya bakaza bagana Yezu kubera ijambo, ubuhamya bw’umugore.
Ivanjili
yatweretse abantu babiri bafite inyota. Hari umugore ufite inyota agashaka
amazi, ariko afite n’inyota yo guha icyerekezo ubuzima, hari na Yezu ufite
inyota ya roho zacu ashaka gukiza. Yezu yananijwe no gushakashaka abo akiza.
Ntihakagire uremererwa n’imitwaro cg ngo yicwe n’inyota kandi dufite Yezu,
Isoko y’Ubugingo bw’iteka. Ibyo kurya bye ni ugukora ugushaka kwa Se udashaka
ko hagira n’umwe uzimira ko ahubwo bose bakira. Turamwigiraho:
ü Kugira
ishyaka ryo gutunganya ibyo dushinzwe no kunoza ubutumwa bwacu:
Yezu ngo nta funguro rindi yari afite uretse gukora icyo uwamutumye ashaka.
Gusohoza neza ubutumwa bwe nicyo kimuraje inshinga.
Bavandimwe
turi mu isi igenda yimika ubunebwe buhoro buhoro aho abantu bashishikajwe gusa
no kugaragara neza nyamara imbaraga bashyira mu kazi zikaba nke cg se ari nta
nazo: imbuga nkoranyambaga, statuses na posts kuri whatsapp n’ahandi zihora
zigaragaza abantu basa neza gusa nyamara bataberekana mu kazi!
Isi
y’iki gihe idutoza kubaho ariko itadutoza gukora bityo bikaviramo bamwe
kwirarira no kubaho bigereranya n’abandi, kurarikira iby’abandi, kwandavura,
gutekinika, kwigerezaho no kubaho mu kinyoma! Nka Yezu dushishikazwe no kunoza
ibyo dushinzwe. Ngo udafite icyo gukora shitani irakimushakira;
Paulo intumwa ati: “Udashaka gukora ajye areka no kurya!”
Iyi vanjili
kandi iratwigisha:
ü Kurenga
amateka yacu n’ibyo adufungiranamo: Amateka y’Abayisraheli
n’Abanyasamariya agaragaza ko batajyaga imbizi kugeza n’aho kuramukanya byari
ikizira.
Aya
ni amateka yacu abantu tugira abo duheza, duha akato kubera impamvu
zitandukanye ndetse umuntu akaba yagera n’aho iyo mibereho mu by’ukuri igayitse
ayishakira ibisobanuro, umuntu agakomeza kubaho atyo nk’aho nta cyabaye: umuntu
akibwira ati: hari abo tutavugana, tutaramukanya… ariko ntacyo bintwaye, nzajya
njya mu Misa, njye mu muryango-remezo, muri korali, mpabwe Ukaristiya,….
Abenshi dufite izo nguni mu buzima bwacu dushaka guheezamo Imana, dushaka
kwigengaho: Nyagasani nguhaye ibindi byose ariko hano ho ntuzakoreho,
ntuzabimbaze ni ibyanjye.
[Umuntu
wubatse inzu nziza nyuma aza kuyigurisha ariko yumvikana n’uwayiguze ko
amusigariza akumba gato azajya yigengaho akagashyiramo ibyo ashatse. Ngo karimo
agasumari yajyaga amanikaho utuntu
twe. Kera kabaye ngo rimwe aza kwica imbwa ayishyira muri ka kumba kuri ka
gasumari. Nyuma y’iminsi mike umunuko ukwira inzu yose! Byabaye ngombwa ko
uwari yarayiguze ayivamo ahunga uwo munuko… Sinjye wahera….]
Ese aho njye
nawe nta kumba mu mutima wacu dushaka guhezamo Imana?
Ako
kumba gashobora kuba akageso runaka, udusigisigi tw’inzangano n’amacakubiri
bishingiye ku mateka yacu, akageso
k’ubugugu n’ubusambo, akageso
k’ubusambanyi, akageso k’ubwirasi, ubwibone n’agasuzuro,… nukomeza
kubaho gutyo urirukana Imana iwawe, mu bawe no mu byawe! Utwo twumba, utwo
dusumari tudashaka ko Imana igeramo, tuvamo umunuko wirukana Imana mu buzima bwacu!
Kuri iki cyumweru Yezu ntashaka ko utaha uko waje cg ngo ukomeze kubaho
uko usanzwe ubayeho. Hari ubwo tugera
kure iyo mibereho
nakwita iya gitindi
tukayinjizamo abandi. Inshuti
zacu abana bacu, aho kubatoza ibyiza, tukabatsindagiramo inzangano n’umwijima twabayemo:
MUNYANGIRE!!
Ese
nta bantu twangishije abandi by’amaherere, ntabo twashyizemo ibitekerezo
by’ivangura? Ntitukaroge abana bacu, ntitukabashore mu nzangano zacu. Niba
dufite amateka mabi nk’abakuru tureke gutoza abato ayo
mabi, tubareke biyandikire amateka yabo. Ubwo tuvuga
ngo ibyiza biri imbere
tubareke babiharanire aho kubafungirana mu mwijima wacu!
Twumvise umugore w’umunyamahirwe, w’umunyamugisha: yajyanye ikibindi kirimo ubusa, mu gutaha atashye yuzuye Yezu. Siwe
wenyine ahubwo n’abo mu muryango we bose. Kubera guhura na Yezu amateka yabo
yarahindutse! Ubutumwa bwa Yezu ni ugutanga ubuzima, ni uguhuza imiryango, ni
ugusana ibyari byarangiritse. Mbega amahirwe!
Nawe ndakwifuriza kuba umunyamugisha nk’uyu mugore:
Uyu
mugore yari ababaje. Ngo yari yaragize abagabo 5 none
yongeyeho n’uwa 6 ariko ntabemera! Aba bagabo bashushanya ibigirwamana
twirukira nyamara bitagira icyiza biduha kuko ntacyo bigira, ni ibyo twirukira, ibyo twihambiraho dushaka
umukiro, ni ibibindi,
ni utwabya duhora twikoreye
dushaka ihaho n’amaramuko, ni imitwaro iduhetamisha ikatubuza amahoro
n’amahirwe, ni imibereho idashamaje tudashaka ko abandi bamenya!
Nyuma yo
guhura na Yezu, umugore yasize ikibindi cye!
Yezu yaramuruhuye. Yamutuye
imitwaro yamuhetamishaga none
aragenda yemye! Yahuye na Yezu araronka! Twebwe bite?
ü Byashoboka ko nawe waje ikibindi cyawe kirimo ubusa. Byaba ari mahire kuko byakorohera
bikorohera na Yezu kukuzuriza.
ü Ariko ku rundi ruhande
byashoboka ko wazanye
ibibindi akangari binuzuyemo ibitari ngombwa,
ibihabanye n’umugambi w’Imana. Usabwa kubimena ukakira ibyo Yezu aguha.
Ni
iyihe nyota wifuza ko Yezu akumara? Ni ikihe
kibindi wifuza gutura ngo utekane? Ni izihe ngeso wifuza gusezerera? Ngo
ujya gukira indwara arayirata. Nta kwiyemera nk’aho byose bigenda neza. Byose
byereke Yezu akuruhure. “Nimungane mwese
abarushye n’abaremerewe n’imitwaro, njye nzabaruhura”! Iri ni ijambo ryiza.
Nta mpamvu yo gukomeza guhetama ibitugu kandi hari “KARUHURA”! Ntihakagire
uhorana umwuma ngo yicwe n’inyota kandi dufite Yezu, Isoko y’Ubugingo bw’iteka.
Dusabirane kugira ngo uko twinjiye
ntitube ari ko dusohoka! Iyaba uyu munsi
twakundaga, tukumva ijwi rye,
ntitunangire imitima yacu! Ntidutahe uko twaje!
Imana iradukunda kdi ihora ituzigamiye ibyiza. Iyo itanze buri gihe itanga ibyuzuye.
Ntijya itanga ibicagase.
Iyo Mana y’Inyampuhwe n’Inyambabazi itwumve kandi iduhe ibyo tuyisaba
tuyizeye. Amina!
Padiri Pie KWITONDA
