Isomo rya mbere: Iz 5,1-7
Isomo
rya kabiri: Fil 4,6-9
Ivanjili:
Mt 21,33-43
Bavandimwe
amasomo yo kuri iki cyumweru aradusaba kwakira Imana mu buzima bwacu,
nk'umuzabibu wa Nyagasani twere imbuto z'ubutungane.
Mukuzirikana aya masomo, tubanze twibaze ibyo
Imana idukorera mu buzima bwacu:
Imana yaduhaye ubuzima, tubukoresha dute? Yaduhaye
imitungo tuyikoresha dute?
Yaduhaye ubwenge tubukoresha dute? Yaduhaye
abavandimwe, tubanye nabo dute?
Yaduhaye byinshi,.. nigute tuyitura? Ni iki
Imana itadukorera?
Mu isomo rya mbere twumvise umuhinzi witaye ku
muzabibu we arawukorera, arawufumbira awitaho uko ashoboye kose yiteze ko uzera imbuto nziza kandi nyinshi. Ariko aratunguwe
asaruye imbuto mbi.
Byagenze gute? Ati"Ko nari nywizeyeho imbuto nziza
ni kuki weze imbuto mbi? Iz 5,4
Uko uwo muhinzi yitaye ku muzabibu we niko
Nyagasani natwe atwitaho nk'abana be n'umuryango we, yizeye ko tuzera imbuto
nziza z'ubutungane, nyamara hari ubwo tumutungura, tukamurumbira!
Umuhanuzi Izayi arakomeza ati"
Icyo nagombaga gukorera umuzabibu wanjye nkaba ntaragikoze ni iki? Ko nari
nywitezeho imbuto nziza ni kuki weze imbuto mbi? Nyagasani yarabatezeho
ubutungane none baratemagurana! Yari abategerejeho ubutabera, none abatishoboye
baracura imiborogo’’. Iz 5, 4.7b
Nanjye nibaze, ese icyo Nyagasani
yarantegerejeho nicyo nkora? Mu butumwa yampaye, mu kazi mfite icyo nari ntegerejweho
nicyo nkora, nicyo bambonaho? Imbuto nagombaga kwerera abandi nizo nabereye? Ntabo
natunguye? Nta banyibazaho ngo byagenze gute? Byapfiriye he? Warize ufite
impamyabumenyi, umusaruro wari utegerejweho niwo watanze? Mu buzima busanzwe,
urugero rwiza bari bagutegerejeho nirwo werekanye cyangwa nirwo uriho werekana?
Mu Ivanjili y'uyu munsi Nyagasani Yezu nawe
aratubwira umugani; Nyir'umurima
n'abahinzi. Aba bahinzi bo bakoze ibirenze
ibyo twumvise mu isomo rya mbere. Umurima bawugize uwabo, ndetse birukana
Nyir'umurima, n’abo abatumyeho
barabirukana abandi barabica!! Yohereza umwana we agira ngo we bazamwubaha,
ariko bo bati tubonye uzamuzungura, baramwica.
Bujya ubuhemu nabwo burakura, n’icyaha
kirakura. Umujura atangira akora mu
mifuka y’abantu bigakura, bikarangira ntacyo agitinya. Aba bahinzi bahemukiye
nyir’umurima, none bamwirukanye mu bye.
Hari gihe natwe twirukana Imana mu buzima
bwacu, tukima uwaduhaye, nyamara tukibagirwa ko idufiteho ububasha. Aba bahinzi birengagije amasezerano bagiranye
na nyir'umurima, bakoze ibyo bishakiye.
Hari ubwo natwe twirengagiza amasezerano
twagiranye n'Imana n’abavandimwe, tukayisuzugura dukora ibyo twishakiye,
tukumva ko twibeshejeho, tukibeshya ko twihagije, nyamara nitutisubiraho, igihe
Ny'ir'umurima ariwe Nyir'ubuzima azazira
azafata umwanzuro ukomeye.
"Aho nyir'imizabibu azahindukirira, azagenza
ate abo bahinzi?. Baramusubiza bati"Abo batindi azabica urw'abagome, maze
imizabibu ye ayatire abandi bahinzi bazajya bamuha ibyatamurima uko isarura
rigeze." Mt 21, 40-41
Umunyarwanda yaragize ati<< iyo
nyir'umuringa aje, utega akaboko>>. Ubwe azaba yiyiziye, ntazindi ntumwa
azohereza. Nyamara gusubiza umuringa ntibizaba bihagije, ahubwo haziyongeraho
no kubazwa icyo twawukoresheje.
Abayahudi aribo Nyagasani yiyeretse bwa mbere
banze kwakira abahanuzi ndetse na Yezu ubwe Umwana w'Imana ntibamwakiriye. Nyamara
ntitwabacira urubanza kuko no muri iki gihe cyacu siko bose bamwakiriye, siko
bose bamwemeye.
"Ngo yaje mubye ariko abe ntibamwakira. Nyamara
abamwakiriye bose, yabahaye ububasha bwo guhinduka abana b'Imana, abo ni
abemera Izina rye." Yoh 1,11-12. Tuzirikane ko kwakira Imana mu
buzima bwacu ari ukwakira abavandimwe n’abo idutumaho bose.
Ni iki Nyagasani adusaba gukora, ni izihe
mbuto yifuza ko twerera abandi natwe ubwacu?
Pawulo Mutagatifu mu ibaruwa yandikiye
abanyafilipi arazidusobanurira ati" Ahasigaye bavandimwe, icyitwa icy'ukuri
cyose kimwe n'igikwiye kubahwa, igitunganye, ikitagira inenge, igikwiye
gukundwa no kuratwa, mbese icyitwa ingeso nziza cyose kandi gikwiye ishimwe,
abe ari cyo muharanira." Fil 4,8
Bavandimwe kujya kure y'Imana nta byishimo
bitanga, kuyirengagiza nukwigerezaho. Twakire neza Nyagasani mu buzima bwacu, twakire
Yezu Kristu, twakire n’abo adutumaho, tumwumve kandi tumwumvire, tuzabona
amahoro y'umutima n'ibyishimo birambye.
Tubisabirane. Amen
