^

Inyigisho yo ku cyumweru cya34 Umunsi mukuru wa Kristu Umwami w’ibiremwa byose(tariki 22/11/2026).

Publié par: Padiri NDAYAMBAJE Denys

Amasomo: 

Isomo rya mbere: Ez34,11-12.15-17;  

Zaburi: Zab22(23),1-6; 

Isomo rya kabiri:1Kor15,20-26.28;

Ivangili: Ivanj: Mt25,31-46


Bakristu bavandimwe, Kristu umwami w’amahoro naganze mu mitima yacu, mbifurije kugira umunsi mukuru mwiza wa Kristu Umwami. Twemere turagirwe na Kristu umushumba Mwiza. Kristu Umwami aje kutubohora, ingoma ye ni iy’amahoro. Tugeze ku cyumweru cya 34 icyumweru gisoza umwaka wa Litulujiya A. Turahimbaza umunsi mukuru wa Kristu Mwami w’ibiremwa byose. Tukuzirikana ko Kristu ariwe Mwami n’Umushumba mwiza, niwe ugenga ubuzima bwacu. Ese nawe muvandimwe iyo wisuzumye ubona Kristu ariwe ugenga ubuzima bwawe? Uyumunsi Imana iratwibutsako twaremewe ijuru, niturikorera tuzarijyamo. Kristu umwami aganze mu mitima yacu, Kristu Umwami we Mushumba mwiza aganze iwacu, atubohore, ature iwawe, ature mu mutima wawe, agutsindire ikibi cyose, agutsindire intege nke, agutsindire ibibazo bigushikamiye byose, agutsindire uburwayi bwawe bugushikamiye, agutsindire Sekibi ugushikamiye, maze aganze mu rugo iwanyu, mumuryango wanyu no  mutima wacu. Bavandimwe Kristu Umwami aganze iwacu.

Amasomo matagatifu yo kuri iki cyumweru aje atwereka Kristu Umwami ndetse n’Umushumba  Mwiza, uragira ubushyo bwe akabwitaho. Mu gihe abami ba hano ku isi bo bashisha, ariko intama baragiye ziri gushira, Yezu Kristu we, aritanga kugira ngo, zigire ubuzima kandi zibugire busagambye(Yh10,10). Ese wowe niba uri umuyobozi, ubona abo uyoboye ubitangira? Cyangwa ujya ushaka kubaho neza, gushisha kandi intama zawe ziri gushira. Umushumba mwiza amenya impumuro y’intama aragiye, akaba hafi y’intama, agasura izirwaye n’izindi zifite ingorane. Agomba gusangira nazo ibyishimo n’agahinda, akamenya ibibazo by’intama ze aho kwibera mu biro gusa.  Mu isomo rya mbere ryo mugitabo cy’umuhanuzi Ez34,11-12, Nyagasani arababaye kubera imbaga ye, kubera ubushyo bwe, umuryango we uri ku ngoyi y’ubucakara. Ababajwe n’abashumba, batayobora neza uko bikwiye, ahubwo bakirira ubushyo baragijwe. None Nyagasani agiriye impuhwe umuryango we ,aje kubereka ko abashumba babi agiye kubakuraho, maze ubwe yiyizire abarokore abatabare kuko barashikamiwe, kuko barashonje, bageze ahabi. Imana mukigereranyo cy’Umushumba mwiza uragira ubushyo bwe akabwitaho, n’ubundi bishushanya Kristu Umwami uje kutubohora ku ngoyi ya Sekibi; ubwami bwe si ubwo kudupyinagaza, ni ubwo kudukiza. Uhoraho yakomeje agira ati: nzashaka intama yazimiye,ngarure iyari yatannye,iyakomeretse nyomore, iyari irwaye nyondore, ibyibushye nkomeze kuyitaho.

Umaze kumva ubugwaneza bw’uyu mushumba mwiza ntiwabura kunga hamwe n’umuririmbyi wa zaburi uti ndagiwe n’umushumba mwiza, ntacyo nzabura. Iyo ndikumwe n’Imana, ntacyo naba ,ntacyo nabura, kuko ufite Imana aba afite byose. Imana indagira mu rwuri rutoshye, iba iri kumwe nanjye mu bibazo no mu ngorane, aho ntashobora kwitambutsa ikahantambutsa, ikamfata ukuboko ngakomera ngatsinda kubera Imana.  Mu isomo rya kabiri naryo Pawulo mutagatifu(1Kor15,20-26) nawe aratwibutsako Kristu yapfuye kubera twebwe, ariko yatsinze urupfu kugirango aducungure adukize. Nyagasani Umushumba mwiza ni wawundi uza mu ishusho y’umugira neza, aje gutabara abakene, aje gutabara indembe, gusura imfungwa, indushyi,imbabare ingorwa,ariko atibagiwe na ba bandi bose biyita abazima, kuko ni Umwami wa bose, Imana y’abaciye bugufi n’abakomeye,bose irabatabara, buri wese kurwe gorwe.

Nibyo twumise mu Ivanjili y’uyu munsi yitwa urubanza rw’imperuka.Twumvisemo ingingo z’urubanza zikubiye mu bikorwabirindwi by’Impuhwe:kugaburira abashonji, guha icyo kunywa abafite inyota, kwambika abambaye ubusa, kwakira abanyamahanga, abari mu ngendo n’abari mukaga, gusura abarwayi, gusura imfungwa no gushyingura abapfuye. Ibyo nibyo Kristu azaheraho kugira ngo atugirire impuhwe. Muvandimwe buri munsi ujye wibuka ko Imana izakubaza abo wagiriye Impuhwe, ntabwo izakubaza abakugiriye nabi, abagututse, ntabwo izakubaza abantu batagusuye, batakubabariye, baguhemukiye,  ahubwo wowe, Imana izakubaza abo wagiriye nabi, abo utasuye, abo utacumbikiye, abo watutse,wasuzuguye, abo wanze kubabarira no kubasaba imbabazi wowe ubwawe. Wowe rero ntukarebere kubandi mu bikorwa by’uburukundo n’ibikorwa by’impuhwe bishingiyeho urubanza rw’imperuka. Ngo uvuge ngo abandi ntibabikora, bujya iyo uzi ingingo z’urubanza,wagombye kuba witegura hakiri kare kugira ngo ejo n’ejubundi, utazasobanya. Ibi nanone bikatwibutsako twateguriwe ijuru.

Bavandimwe nta numwe Imana yigeze itegurira umuriro, ahubwo niwowe,ninjye dushobora kuwitegurira kubera ibikorwa byacu, niwowe witegurira uko uzatsinda urubanza rw’imperuka cyangwa ukazarutsindwa. Tube maso rero kugirango tuzatsinde hamwe na Kristu watsinze. Uko twumvise mu ivanjili umwami amaze kugaragariza impande zombi uko bitwaye mu bikorwa by’impuhwe, bose batunguwe n’ibikorwa buri wese yakoze. Hari ibyo batibukaga rwose. Yezu Kristu Umwami ku munsi w’urubanza niwe uzakwibutsa,ya neza wakoze wihitira, bikagutungura. Burya umuntu wagiriye neza ntashobora kukwibagirwa. Wowe wakwibagirwa kuko nubundi ngo ntawe ubara ibyo atanze ineza ugize, imfashanyo yawe utanze ningombwa ko biba mu ibanga(Mt6,1-4) ntujye kwifotoza hamwe nuwo ufashije ngo werekane icyo utanze, bijye bimenywa na Yezu. Ntukajye ubara ineza ni Kristu ushinzwe kubyandika, jya ureka Yezu Kristu akubarire, uwo ugiriye neza  we ntashobora kwibagirwa ineza wa mugiriye kandi n’iyo yakwibagirwa So wo mu ijuru azabikwitura (Sir12,1-5).

Ku rundi ruhande rw’ibumuso nabo batunguwe n’inabi bagize.  Mu buzima busanzwe nanone iyo umutimanama w’umuntu wamaze guhuma hari igihe agira nabi ntabimenye, ahubwo nubundi bikamenywa nuwo yagiriye nabi. Yezu Kristu uza mu banyantegenke,mu baciye bugufi niwe umenya ibyo byose. Keretse iyo ufashe umugambi mwiza wo gusiiba no kwigomwa, maze ugasiba inabi n’ingeso mbi wagize, kuko ayomahirwe Yezu arayatanga kubera impuhwe ze. Iyo wicujije ubikuye ku mutima ibyaha byawe ntibyongera kwibukwa ukundi ubikesheje ko wakurikije ubutabera bw’Imana (Ez18,21). Ese muvandimwe urabona nawe ibikorwa byawe bizagutungura? Urabona se uzatungurwa no kwibona he,ibumoso mu ihene mu bakoze nabi? Cyangwa iburyo mu ntama mu bakoze neza? Intama zirubaha, ariko ihene zisa n’izisuzugura, uzarebe iyo ukurura ihene idashaka, ishinga ijosi ntipfe kuva mu byimbo. Ibyo biratuganisha ku bantu basuzugura, bagapinga, ba bandi nyine bazajya ibumoso.

Ngo umunsi hari umugabo wakundaga icyubahiro n’ubutegetsi cyane ku buryo itsinda ryose yabagamo yagomba kuribera  umushefu, ngo aho agiye hose mu itsinda bagahita bibwiriza bakamutorera kuba umuyobozi, nk’icyubahiro bamugomba. Ngo yakoraga amafuti menshi kuberako yabaga ari umuyobozi ngo ntihagire utinyuka kumutunga agatoki, kugirango atamererwa nabi. Nuko umunsi umwe uyu mugabo aza gukora amakosa aremereye cyane inzego zo hejuru ziratabara, ngo bumvise uburemere bw’amakosa yari yakoze,akanga no gusaba imbabazi, bahita bamufunga. Ageze mu buroko nanone ashaka gukomeza gutegeka. Abashinzwe uburoko bati uyu muntu ntitwa mukira tutamuhaye ubutegetsi. Nuko bamuha icyo cyubahiro nk’umutegetsi cyo kuyobora imfungwa zose. Nuko ngo nk’umutegetsi wari usanzwe amenyereye ibyo gutegeka no gutanga amategeko, ahita atumiza imfungwa zose mu nama, aziha iri itegeko ati: uzibeshya akansuzugura nzamuhana bikomeye, nzahita musuka hanze, nuko imfungwa zose zihita zimukomera amashyi, naho undi akagira ngo ni cya cyubahiro cye bari gukomeza bamuha. Arongera ati akazakora amakosa kakansuzugura nzakirukana muri gereza. Bakomeza bamukomera amashyi. Nuko mu minsi mike batangira kujya bakora amakosa. Nuko umusuzuguye wese, akamwirukana muri gereza, nuko ngo hashize iminsi myinshi, wa mutegetsi asanga asigaye wenyine mu buroko. Byumvikane ko nyine imfungwa zose yari yaragiye azirukana ngo za musuzuguye. Aba asigaye muri gereza wenyine,kubera gukunda icyubahiro n’ubutegetsi. Uyu mugabo arashushanya Sekibi. Ese nawe muvandimwe urashaka kuzasigara mu gereza y’ikuzimu kubera kugundira icyubahiro n’ubutegetsi by’iyisi?

Bavandimwe ibintu by’isi amakuzo y’isi ibyo byose bizashira. Kristu Umwami ni We uzahoraho iteka yaratsinze, ingoma ye ihoraho,ni iy’amahoro, ingoma ye ni iy’urukundo, iy’ubwiyoroshye, no kwicishabugufi. Yazanywe no kutubohora mu buroko bw’icyaha, bya byaha byatugize imbata, byatugize imfugwa za shitani,  umuntu akaba imfungwa y’ubusinzi, imfungwa y’ubugugu n’ubusambo, imfungwa y’urwango n’umujinya, imfungwa y’ukwikuza no kwiyemera ndetse no gukunda ibyubahiro n’amakuzo y’iyisi, imfungwa y’ubusambanyi n’ubuhabara no guca inyuma uwo mwashakanye, kuba imfungwa y’uburyarya n’uburiganya, ndetse n’ubugambanyi,imfungwa y’ishyari gucira bandi imanza no kubaharabika n’izindi gereza nyinshi za sekibi atuboheramo. Izo zose ni gereza z’urupfu kuko icyaha kiganisha ku rupfu. Muvandimwe wikomeza kwisunga shitani ngo ukurikire uburyohe bw’icyaha hato utazamufasha kota umuriro w’iteka we n’abambari be. Nusuzugura shitani uzahita usezererwa mu buroko, bw’icyaha, uburoko bw’umuriro w’iteka. Emerera Kristu Umwami akubohore acagagure iminyururu ya sekibi ikuboshye, igatuma utinyagambura ukagandazwa n’intege nke. Kristu Umwami akubohore, ubuhoke nawe ubohore abandi, ureke gukomeza kuba imfungwa. Kristu Umwami tumuyoboke, atsinde aganze kandi ategeke mu mitima yacu. Amen

Retour aux homelies

Homélies récentes
Inyigisho ziheruka