Amasomo matagatifu tuzirikana:
ü
Isomo
rya mbere: Intu 10,34a.37-43 ;
ü Zab 118(117), 14, 16-17, 22-23 ;
ü Isomo rya kabiri: Kol 3,1-4 ;
ü
Ivanjiri:
Yh 20,1-9
YEZU NI MUZIMA, YEZU YAZUTSE, YATSINZE SHITANI, ICYAHA
N’URUPFU, ALLELUYA !!!!!!!!!
Bakristu, bavandimwe, nimugire Pasika nziza, Yezu ni Muzima, Yezu yazutse,
Alleluya, Amen ! Bavandimwe, nyuma y’iminsi 40 y’Igisibo Gitagatifu tuje
guhimbaza mu byishimo umunsi Mukuru wa Pasika : Yezu ni muzima, Yezu yazutse, Yezu yatsinze Shitani, icyaha n’urupfu.
Uyu ni umunsi Uhoraho yigeneye nutubere umunsi w’ibirori n’ibyishimo, Alleluya,
Kristu Yezu ni Muzima. Ni ngombwa kumva igisobanuro cya Pasika twizihiza none
icyo ihuriyeho n’icyo itandukaniyeho na Pasika yo mu gihe cya Musa ubwo
Umuryango w’Uhoraho wabohorwaga ubucakara bwo mu Misiri. Urangajwe imbere na Musa,
wambutse inyanja y’Umutuku ugenda werekeza mu gihugu Uhoraho yari
yarasezeranyije Abrahamu n’urubyaro rwe. Twe uyu munsi turizihiza izuka rya
Yezu Kristu ; yambutse urupfu agana ubuzima nyabuzima.
1. Ubuhamya
ku izuka rya Yezu
Izuka rya Yezu
Kristu ava mu bapfuye ni insinzi abakristu twishimira cyane kuko ari insinzi
yacu. Yezu yadutsindiye Shitani, wa mushukanyi utera abantu ibyaha, ibyaha na
byo bigakurura urupfu. Yayitsindiye ku
giti cy’umusaraba agira ngo ayitsimbure mu birindiro byayo yo yashukiye abantu
ba mbere ku giti cyo muri Edeni.
Yezu yarapfuye, nyuma
y’iminsi itatu arazuka nk’uko byari byaranditswe, kugira ngo abe bapfe ku cyaha kandi bapfire
muri We binyuze mu isakramentu rya Batisimu yasize ashinze muri Kiliziya ye, batsinde
muntu w’igisazira, maze twese dutunge umunezero uzira iherezo, bityo ntihagire
ikizadutandukanya n’urukundo adukunda.
Abanditsi 4 bose
b’Ivanjili Ntagatifu bahuriza ku kuzindukira ku mva kwa Mariya Madalena n’abandi bagore mu gitondo cya Pasika.
Wakwibaza uti « kuki ari bo ba mbere babonye imva irimo ubusa, bakamenya
iri zuka mbere y’intumwa ? » Twibuke ko no mu bubabare bwa Yezu Intumwa
zari zahunze, nyamara abo bagore bo bamukurikiye mu rubanza, banagera i
Gologota, bagahagarara iruhande rw’umusaraba. Ibi bitwereka ko bamwiziritseho bihagije;
mu bihe byiza no mu makuba ntibaviririye Nyagasani. Mariya Madalina abaye umugore wa kabiri wamamaje Kristu mu
bavandimwe be nyuma ya wa wundi wo kuri Samariya wagiye kwamamaza mu rusisiro
rw’iwabo ko yabonye Mesiya, ko yahuye n’uwanditse mu Bitabo bya Musa n’iby’Abahanuzi
(Yh 4, 28-30).
Mariya Madalina
akibona imva ikinguye, irimo ubusa yarahangayitse ahuruza Petero na Yohani na
bo bajya kureba ibyo ari byo, Petero yararebaga ntasobanukirwe, kugeza ubwo
bari yari atarumva ibyerekeye izuka ry’abapfuye. Yohani we afite icyo amurusha :
yararebye aremera. Ibyo yabitewe n’umubano ufatika yari afitanye na Yezu.
« ngo ni we wa mwigishwa Yezu yakundaga maze na we akajya amwegamira mu
gituza ! » Urwo rukundo rwatumye yemera. Urukundo nyarwo rudukuzamo
ukwemera. Mbese iyo turirimba ngo « jyewe na We tubaye umwe mushyitsi
muhire, koko Yezu turamwemerera ngo atubere umushyitsi muhire ? Twamuhabwa
mu Ukaristiya akatubera icyarimwe igitambo, ifunguro n’inshuti tubana muri
byose na hose ? » Turongera tukavuga ngo « tumweguriye imitima
yacu ngo ayituremo, n’izindi mvugo nyinshi … ! » Mbese koko tubivuga
duhari cyangwa tuba twibereye ahandi ? We ntajya adusiga kuko yazanywe no
kubana natwe, kuduha ubugingo no kudukiza ibyaha. Mariya Madalina na Yohani tubigiyeho iki uyu munsi mu
kubana na We?
Natwe nka Petero
iyo tweguwe n’agahinda duterwa n’ibyago, intambara, urugomo, indwara, ubukene
n’inzara bihora biyogoza isi ntibitworohera kumenya icyo gukora habe no kwibuka
ko Yezu ari hamwe natwe aho tunyura hose ! Petero aracyahuzagurika mu kwemera, bizasaba
ko ahura na Yezu wazutse imbonankubone kugira ngo azamuzamure ku yindi ntera y’ukwemera.
2. Muntu
wari we mbere ya Pasika anyuranye n’uwo
ugomba kuba we nyuma yo guhura na Yezu wazutse.
Ni byo twumvishe
mu Isomo rya mbere ukuntu Petero wahuye na Yezu wazutse atandukanye cyane na wa
wundi wo kuwa Gatanu Mutagatifu ubwo yihakanaga Umwami we imbere y’abaja
n’abagaragu ! Nyamara kubera
imbaraga za Roho Mutagatifu yahawe na Yezu wazutse, ubu arahagarara imbere
y’abatware, abategetsi, abafarizayi, abaherezabitambo, abakuru b’umuryango
n’abasirikri akababwira ashize amanga, akabashinja uruhare rwabo muri urwo
rupfu, agahamya ibigwi bya Yezu wagenda agira neza aho yanyuraga hose, yamamaza
Inkuru nziza y’umukiro, akiza abahanzweho na Sekibi bose kuko Imana yari kumwe
na We (Intu 10,38).
Inyigisho ya
Petero irakomeye kandi ubuhamya bwe burasobanutse. Aragira ati :
« twebwe abaririye kandi tukanywera hamwe na We aho amariye kuzuka mu
bapfuye… » biratwereka ukuntu numa ya Pentikosti ibintu byabaye
bishya. Imbaraga za Roho Mutagatifu
zamufashije kuva muri Senakulo maze yamamaza Inkuru Nziza y’umukiro.
3. Pasika
nidufashe kumva neza ubuzima n’imibereho by’abagize Kiliziya
Pentikosti
yabaye intangiriro y’ubuzima bushya bw’abemera Kristu. Tugiye kuzamara iminsi
50 yose twumva isomo rya mbere rikuwe mu gitabo cy’Ibyakozwe n’Intumwa ukuntu Kiliziya yavutse, imibereho y’abemera
ba mbere, isengesho, ubumwe, gukundana, gufashanya n’ubwitange byabarangaga ari
na byo byatumaga abemera bashya biyongera, kandi izo nshingano ni twe abariho
uyu munsi twazisigaranye. Urumuri rwa Kristu wazutse ni twe tugomba kurukongeza
hose muri iyi si igenda yuzuramo ubuhakanyi na ba Ntibindeba ! N’ubwo
bimeze gutyo ariko nta rwitwazo n’impamvu tugomba kuzana, ahubwo nka Pawulo
Mutagatifu «turiyimbire niba tutamamaje Inkuru Nziza » (1 Kor 9,16). Dusabirane kugira ngo Roho Mutagatifu akomeze
yenyegeze mu mitima yacu icyo kibatsi cyo guhagukira ubutumwa.
Mu gihe Igisibo
cyamaze iminsi 40 Kiliziya idushishikariza gusenga, gusiba no gufasha, Pasika yo
izamara iminsi 50 kugira ngo muri twe hapfe ibigomba gupfa, tubeho mu buzima
bushya.
4. Ibyo
tugomba kwibandaho n’ibyo tugomba kureka
Bakristu,
bavandimwe muri iki gihe cya Pasika hari byinshi dusabwa kwibukiranya no
kwibandaho n’ibindi tugomba kureka:
Ø Yezu
Kristu yazutse mu bapfuye bityo
aduharurira inzira kugira ngo abe tuzashobore kuyinyuramo tugana ikuzo rye tudakangaranywa
n’urupfu kandi twizeye gutsinda icyaha nka We. Yezu Kristu yaratubimburiye ;
yatsinze Shitani, icyaha n’urupfu. Abemera bose muri We duhabwa imbaraga,
ubuzima n’ubugingo bw’iteka. Si ukubitunga ngo tube indorerezi, ahubwo biduha inshingano zo kumuhamya no kumwamamaza muri hose
muri rubanda, tukigisha abavandimwe bacu ko ari We mucamanza utabera w’abazima
n’abapfuye, ko muri We ariho tuzaronkera imbabazi z’ibyaha.
Ø Turasabwa
gusabira Kiliziya umubyeyi wacu n’abayobozi bayo kandi kububaha ni iby’agaciro
nk’uko bigaragaye muri iyi Vanjili Ntagatifu aho Yohani yirukanka akarusha Petero amaguru, ariko yagera ku mva
agategereza ko umukuru (umuyobozi Petero) abanza kwinjira akaba ari we utangaza
ibyo yabonye.
Ø Iyi
Nkuru Nziza ya Yezu Kristu wazutse mu bapfuye tuyamamarize mu buzima bwacu :
tugendera kure muntu w’igisazira twari we kera tukibera mu mwijima, dupfa ku
cyaha, dutandukana n’inabi, ishyari, ubugome n’ubugambayi nk’ubwo Yezu yagiriwe
n’abategetsi bafatanyije n’abe hamwe na rubanda.
Ø N’ubwo
nta nyiturano ifatika twamuha, reka duhaguruke turangamire uwahinguranyijwe
n’icumu, agapfa mu mwanya wacu, reka tumuhange amaso, tumuramye,
tumushengerere, tumwegurire imitima yacu burundu ayituremo byuzuye.
Bikira Mariya
twarazwe, umwamikazi w’izuka naduhakirwe iteka !
Padiri Théoneste NZAYISENGA
Retour aux homelies
