Amasomo
matagatifu tuzirikana:
ü Isomo rya
mbere: Iz 25,6-10a
ü Zaburi:
Zab 22
ü Isomo rya
kabiri: Fil 4,12-14,19-20
ü Ivanjiri ntagatifu: Mt 22,1-14
Kuzikana
Ijambo ry’Imana: Hejuru ya byose, Uhoraho ni we Mana yacu.
Mu
gihe turi kwegereza gusoza umwaka wa Liturjiya, Kiliziya iratwereka ko igihesha
agaciro ubuzima bwacu muri iyi si, atari kuba umukungu cyangwa umukene (reba
Fil 4,12), ahubwo gukomera ku butungane bubyarwa no guhorana amahitamo
atuganisha ku Mana yacu, yo dufitemo amizero y’amahoro adakama n’ubugingo
bw’iteka (Reba Iz 25,8). Mu buhanuzi bwe Izayi atwereka ko nta ntambara cyangwa
urupfu bizongera kuvugwa ku gihugu no mu muryango w’abayoboke b’uhoraho. Aya
masezerano y’Uhoraho aduhamiriza ko amarira akomoka ku makimbirane n’intambara
mu bantu atari yo afite ijambo rya nyuma, imihangayiko y’ubukene bwa none na
nzamera nte kimwe n’umururumba n’ubwikanyize bw’abatunzi b’iby’isi bibwira ko
aribwo buryo bwo kubirinda, byose bizimukira ibirori by’abiteguye kwakira
ubutumire bwo mu Ngoro ya Nyagasani nk’uko Ivanjili ibidushushanyiriza. Uyu
mukiro niwo utegerejwe n’imbaga y’abiringiye uhoraho kandi bakamuyoboka.
Kwiringira
Uhoraho bisobanura kumenya ko ikiza cyose twifitemo ndetse n’ibyo dukungahayemo
byose, bitatubera isoko y’amahoro mu gihe twakwitandukanya n’Imana soko
y’ibyiza byose. Nguko uko abari basanzwe aribo batumirwa mu birori by’umwami,
babyihejemo nyamara amahitamo yabo yo kwigomeka akababyarira kurimburwa kw’isi.
Uyu mwami uvugwa ni Uhoraho Imana udutumirira kuzaragwa ibirori by’iteka
by’umutsindo w’umwana we Yezu Kristu. Kwiringira Uhoraho kandi bivuze ko uburyo
bwose wakwisangamo ko uri mubi, ukennye mu migenzo myiza nyobokamana kandi ya
gipfura, ko mu gihe cyose wagarukira Imana yuje impuhwe n’imbabazi wakwakirwa
mu batumiwe mu bukwe bwa Ntama w’Imana nk’uko Ivanjiri ibidushushanyiriza mw’isura y’uyu
mwami utumira ababi n’abeza, nyamara agashikariza ababi kwambara umwambaro
w’ubukwe: ari byo kuvuga ubutungane n’ibikorwa bitagatifu. Ni koko mu buntu
bwayo Imana ntawe iheje mu mukiro yageneye bene muntu, nyamara mu butungane
n’ubutabera bwayo, muntu we mu mahitamo ye ashobora kwivutsa aya mahirwe y’umukiro.
Uhoraho
ngo azategurira ibirori abantu bo mu miryango yose no mu bihugu byose. Niko
Izayi abyemeza. Na Kiliziya, mbere yo kutugaburira Umubiri wa Kristu,
ikatwibutsa iti “hahirwa abatumiwe ku meza ya Nyagasani”. Ngaha rero
ahatazataramira abo bose bibohesheje iminyururu y’urwango, amacakubiri kimwe
n’ababaswe n’urukundo rw’ibyisi kugezaho bahitamo no kugira ibitambo bagenzi
babo mu gihe bakeka ko babangamiye mu nzira zo kubigeraho cyangwa mu mugambi wo
kwikubira ibyakaramiye abakene babakikije.
Reka
twumve Izayi utubwira ko nta bwoko buruta ubundi, nta muryango cyangwa igihugu
kiruta ikindi mu mugambi w’Imana wo guhuriza hamwe mu Ngoro yayo abayo bose bo
mu bihe byose no mu miryango yose. Nitwumve kandi Pahulo uduhamiriza ko imiruho
yose nk’ubukene cyangwa amahirwe twagirira muri iyi isi nko kwisanga mu
bahiriwe no gukungahara muri byinshi binyuranye, ko muri ibi byose urufunguzo
rwo kubitambukamo neza ari ukubaho turangamiye Imana n’ugushaka kwayo. Nk’uko
izayi abitubwira kandi, igihe amarira yose, urubwa n’agasuzuguro bizaba bimaze
guhanagurwa, umwanzi wa nyuma ariwe rupfu amaze gutsindwa, twese abayoboke
b’Imana tuzikiranya turirimba ko Uhoraho ari we Mana yacu, ko twatunzwe
n’amizero y’isezerano ry’umukiro we none tukaba tuwutashyemo!
Yezu
Kristu mu rugero rwe rwo kudupfira, niho dutorezwa kandi dukura imbaraga zo
gutabarana no kunganirana. Bityo ufite imbaraga akazikoresha mu gutabara no
kurengera abanyantege nke, maze n’ubukire bw’abatunzi bukaramira abakene,
abapfakazi, imfubyi n’indushyi. Ni koko kandi birakwiye, kuko abakene
n’indushyi tuzaba twaragobotse, nibo bazatwakira kandi batuburanire nyuma y’ubu
buzima!
Mwese
mugire icyumweru cyiza!
Padiri Pie Nzayisenga
Retour aux homelies
